Syair Aceh.
Perwal 51, Upaya Taceugah Covid di Kota
Oleh Mahdi Andela
Assalamualaikom, kawom meutuwah
jinoe lon surah, na saboh haba.
Ngen sya-e Aceh, lon tuleh kisah
mangat leubeh pah, watee neubaca.
Lam upaya taceugah, Covid 19
bek le meuluwah, di dalam kota.
Ka lheuh geu peuteubiet, le popeurintah
aturan jelah, lam perwal 51
Mandum ureung, meunan geusurah
wajeb tapapah, 4M tajaga.
Tapakek masker, beuteutop idong ngen babah
Bek sagai lengah, wahee syedara.
Taduek lam warong, cafe ngen meulasah
u kanto ta langkah, masker wajeb na.
Bek sagai tabuka, rakan meutuwah
supaya wabah, beubagah sirna.
Ban dua jaroe, beu kayem tarah
nibak ie curah, ngen sabon ta upa.
Kadang na tamat, sipeu peu wadah
bek dilee mat babah, idong dan mata.
Teuma yang keu lhee, lam perwal gue surah
virus bek dipindah, jarak tajaga.
Taduek ngen tadong, haba tapeugah
bek toe toe leupah, beuna sideupa.
Teuma yang kee peuet, rakan meutuwah
bek neu jak langkah, lam kerumunan masa.
Bek neujak sak droe, adoe meutuwah
bak ureung meuruwah, taminah sigra.
